Rahotanni sun bayyana cewa, zuwa yanzu Kwamishinoni 5 tare da jami’an Gwamnatin Jihar Kano 10, ne su ka ajiye muƙamansu tare da jaddada biyayya da goyon baya ga jagoran Kwankwasiyya, Injiniya Rabi’u Musa Kwankwaso.
Wannan dai na zuwa ne a daidai lokacin da aka raba gari tsakanin Kwankwaso, da Gwamnan jihar Kano Injiniya Abba Kabir Yusif.
Shalkwatar tsaron Najeriya ta tabbatar da yunƙurin juyin mulki a watan Oktoban bara
Kafar yaɗa labarai ta Arewa Updates ta tattaro wannan adadi ne daga abin da ya bayyana zuwa safiyar ranar Talata 27 ga Janairun 2026.
Daga cikin kwamishinonin da su ka yi murabus ɗin akwai ɗan Kwankwaso na cikinsa, Kwamishinan Matasa da Wasanni Mustapha Rabi’u Kwankwaso, Kwamishinan Kimiyya da Fasaha Dr. Yusuf Ibrahim Kofarmata, da Kwamishinan Ayyuka na Musamman Nasiru Sule Garo, Kwamishinan Jin Ƙai Adamu Aliyu Kibiya, da Kwamishinan Tsaron cikin gida AVM Ibrahim Umar, mai ritaya.
Haka zalika, akwai suma wasu manyan jami’an gwamnati da su ka ajiye muƙamansu, ciki har da Shugaban Hukumar Jin Daɗin Alhazai ta Jihar Kano Laminu Rabi’u Ɗanbaffa, Shugaban Hukumar Gidan Zoo Sadiq Kura Muhammad, Shugaban Hukumar KARMA Alhaji Hassan Danbappa, da SSA GSM Market Sani Shehu Makarya wanda aka fi sani da Igwe China.
Sauran sun haɗar da Walidin Kwankwasiyya Mai Taimaka wa Gwamna kan harkokin Masarautu, da Hajiya A’in Jafaru Fagge, Mai Baiwa Gwamna Shawara kan Yaɗa Kyakkyawan Saƙo, da Mujtaba Muhammad Auwal Jami’in Alhazai na Karamar Hukumar Gwale.
Sai kuma Hon. Nafiu Umar Dankura SSA Protocol Abuja, da Aminu Sa’idu Meenan Kwankwasiyya, da Shafa’atu Ahmed LondonBe masu riƙe da muƙamin Babban Masu ɗaukar wa Gwamna rahoto a ma’aikatu daban daban a jihar Kano.
A cikin bayanan murabus ɗin, jami’an sun bayyana cewa sauye sauyen siyasa da rikicin da ya kunno kai a jihar Kano, ne suka sa suka ɗauki wannan mataki, tare da tabbatar da ci gaba da mara wa tafiyar Kwankwasiyya da jagoranta Injiniya Rabi’u Musa Kwankwaso baya.
A ranar Litinin 26 ga watan Janairu, 2026, ne dai gwamnan Kano Abba Kabir Yusuf, ya koma jam’iyyar APC, a hukumance.