Rundunar ’Yan Sandan Jihar Kano ta haɗa kai da ƙungiyoyin fararen hula da matasa wajen shirya taron tattaunawa kan muhimmancin zaman lafiya da tsaro kafin zaɓe, yayin zaɓe da kuma bayan zaɓe.
Taron, wanda aka shirya tare da haɗin gwiwar ƙungiyar YOSPIS, ƙarƙashin jagorancin Zainab Nasir Ahmad, da Gidauniyar AMG, ƙarƙashin jagorancin Aminu Magashi Garba, ya samu halartar matasa da sauran masu ruwa da tsaki.
Read also: Kano Police Engage Youths, Civil Society Groups on Peaceful Elections
An gudanar da taron ne domin samar da dama ga mahalarta su bayyana ra’ayoyinsu tare da bayar da shawarwari kan hanyoyin tabbatar da sahihin zaɓe cikin zaman lafiya da kwanciyar hankali.
Haka kuma, taron ya mayar da hankali kan rawar da matasa da ƙungiyoyin fararen hula za su taka wajen hana tashe-tashen hankula, guje wa amfani da matasa wajen aikata laifuka da kuma inganta zaman lafiya a tsakanin al’umma.
An kuma tattauna muhimmancin haɗin gwiwa tsakanin jami’an tsaro, shugabannin al’umma da ƙungiyoyin matasa wajen gano abubuwan da ka iya haddasa rikici da kuma ɗaukar matakan shawo kansu tun da wuri.
Taron ya jaddada cewa tabbatar da zaɓe cikin lumana ba alhakin jami’an tsaro kaɗai ba ne, illa nauyin da ya rataya a wuyan dukkan ’yan ƙasa da masu ruwa da tsaki.