A wani yanayi da ba a saba gani ba, an shiga watan Janairu na sabuwar shekara, amma har yanzu yanayin sanyi bai tsananta ba a wasu sassan ƙasar, musamman a yankunan arewacin Najeriya.
A al’ada, watannin Disamba da Janairu sukan kasance lokacin sanyi mai tsanani, inda ake samun hazo mai kauri a wasu birane da ƙauyuka na Arewa. Sai dai a wannan karo, al’amarin ya sauya, lamarin da ya jawo damuwa da tambayoyi daga ɓangarori daban-daban na al’umma.
Yayin da wasu ke ganin sauyin yanayi ne kawai da ba shi da wata matsala, wasu kuwa na ganin akwai wasu abubuwa na daban da ke faruwa, wanda ke bukatar kulawa ta musamman.
Masana dai sun bayyana cewa wannan yanayi na da alaƙa da sauyin yanayi (climate change), wanda suka ce yana da nasaba da ayyukan da ɗan’adam ke aikatawa, kamar sare itatuwa ba tare da shiri ba, gurbata muhalli, da kuma yawaitar hayaki daga masana’antu da ababen hawa.
A cewarsu, duk lokacin da aka fara ganin abubuwan da ba a saba gani ba a yanayi, hakan na nuna buƙatar ɗaukar matakai na gaggawa domin rage illa a nan gaba.
Da yake tsokaci kan lamarin, Umar Saleh Anka ya ce matsalolin da sauyin yanayi ke haifarwa ba sa gushewa nan take.
“Ba za a iya gyara ko sauya illolin sauyin yanayi cikin ɗan gajeren lokaci ba. Abin da za a iya yi shi ne rage tasirinsa a hankali, da kuma ɗaukar matakan kariya,” in ji shi.
Anka ya lissafa wasu matakai da ya ce suna da muhimmanci wajen rage illolin sauyin yanayi, ciki har da:
Dasa itatuwa
Rage sare itatuwa
Amfani da dabarun noma na zamani da ba sa gurbata muhalli
Amfani da iri mai jure fari
Wayar da kan al’umma
Samar da dokoki na musamman kan sauyin yanayi