Tsohon ɗan takarar mataimakin shugaban ƙasa na jam’iyyar Labour a zaɓen 2023, Yusuf Datti Baba-Ahmed, ya soki matakin Shugaba Bola Tinubu na ayyana dokar ta-ɓaci kan tsaro a faɗin ƙasar, yana mai cewa matakin “bai dace ba, kuma ba shi ke magance matsalar tsaro ba.”
A hirar da ya yi da Arise TV, Baba-Ahmed ya ce dokar ta-ɓacin “ta samo asali ne daga rashin fahimtar ainihin matsalar da ake fuskanta,” yana mai kiran matakin “abin ban dariya da ba zai kawo canji ba.”
Yawan Al’umma Na Iya Tsananta Matsalar Tsaro a Nijeriya-Bankin Duniya
Ya kuma soki shawarar gwamnatin tarayya ta dakatar da gina makarantu a yankunan karkara saboda tsaron makarantun, yana cewa wannan mataki “mai haɗari ne kuma babbar kuskure.” A cewarsa, aikin malamai wajen raya ƙasa ya yi daidai da rawar jami’an tsaro, don haka dakatar da gina makarantu “ba mafita ba ce.”
Baba-Ahmed ya yi watsi da shirin gwamnati na ɗaukar ƙarin jami’an tsaro 50,000, inda ya bayyana cewa matsalar ba ƙarancin ma’aikata ba ce, illa yawaitar cin hanci da karkatar da kuɗaɗen tsaro.
Ya ce, “Idan aka dakile cin hanci a ma’aikatar tsaro, ‘yansanda kadai za su iya shawo kan matsalolin ta’addanci da fashi cikin makonni kaɗan.”
Dangane da batun ƙirƙirar masu gadin daji, ya ce babu buƙatar hakan saboda rundunonin tsaro na ƙasa tuni suna da ƙwarewar da ake buƙata idan aka ba su ingantaccen jagoranci. Ya kuma tunatar da irin rawar da sojojin Najeriya suka taka wajen daidaita ƙasashen Afrika tun daga shekarun 1970.