Yayin da yanayin sanyi ke bayyana a sassan Najeriya, masana harkokin lafiya na gargadin cewa wannan lokaci na zuwa da matsalolin da suka shafi lafiyar bil’adama, musamman sakamakon busasshiyar iska da ƙura da ke yawo daga hamadar Sahara.
Lokacin sanyi, wanda kan fara daga ƙarshen watan Nuwamba zuwa tsakiyar Maris, na rage zafin jiki ƙwarai — yayin da masana suka ce saukar zafi zuwa kasa da kashi 15% kan iya kawo cikas ga wasu muhimman sassan jiki, ciki har da fata, ido, da tsarin numfashi
Sauyin Yanayi Na Canza Yanayin Sanyi A Arewacin Najeriya — Masana
A cewar Dr. Rabi Sufi daga Asibitin Koyarwa na Mallam Aminu Kano, yanayin sanyi na da alaƙa da yaduwar cututtuka masu shafar numfashi.
“A wannan lokaci mutane kan shaƙi ƙura sosai, wanda ke haifar da tari, mura, ƙan-jiki da kuma kaikayin makogwaro,” in ji ta
Ta ce busasshiyar iska na janyo bushewar fata, wadda a wasu lokuta kan kai ga tsagewa. Haka kuma tarin ƙura a iska na haddasa ƙaiƙayi ko kumburin ido da matsalolin hanci saboda su ne hanyoyin da ƙura ke shiga jiki.
Likitar ta ce akwai mutanen da ke ɗauke da wasu cututtuka tun farko, amma yanayin sanyi kan kara dagula musu lamarin.
“Asthma na daga cikin cututtukan da sanyi kan tsananta, musamman idan mutum ya shaƙi ƙura,” a cewarta.
Ta ce yanayin sanyi na janyo raguwa a danshin jiki, wanda hakan kan raunana garkuwar jiki, lamarin da ke haddasa samun matsala ga masu fama da cutar sikila.
Masana na ba da shawarar mutane su kula da suturarsu, musamman a lokacin da iska ke da tsananin sanyi.
Farfesa Isa Sadiq Abubakar, kwararren likita a AKTH, ya ce “Ya kamata a rufe jiki sosai. Sanya hula, ɗan kwali ko murfi yana taimakawa wajen rage shigar sanyi cikin jiki.”
Ya ƙara da cewa takunkumin fuska na taimakawa musamman ga mutanen da ke da cututtukan numfashi, domin rage shakar ƙura.
Ya kuma ja hankalin iyaye da su kula da yadda yara ke sa kaya tare da tabbatar da suna cin abinci mai gina jiki domin ƙarfafa lafiyarsu.
“Lokacin sanyi ba lokaci ne mai daɗi ba ga kayan jiki. Kariya ce hanya mafi sauƙi da tasiri,” in ji shi.